ភ្នំពេញ៖ ប្រធានរដ្ឋសភា សម្តេចចក្រី ហេង សំរិន បានទទួលជួបសម្តែងការគួរសមជាមួយ ប្រធានាធិបតីនៃសាធារណរដ្ឋប្រជាធិបតេយ្យទីម័រឡេស្តេ លោក ចូហ្សេ រ៉ាម៉ូស ហ៊រតា (José Ramos Horta) នៅវិមានរដ្ឋសភា នារសៀលថ្ងៃទី២០ ខែតុលា ឆ្នាំ២០២២។

ប្រធានាធិបតីនៃសាធារណរដ្ឋប្រជាធិបតេយ្យទីម័រឡេស្តេ បានអបអរសាទរ និងសប្បាយរីករាយដោយឃើញកម្ពុជាមានការអភិវឌ្ឍយ៉ាងឆាប់រហ័ស។ លោកប្រធានាធិបតី បានថ្លែងអំណរគុណយ៉ាងជ្រាលជ្រៅដល់កម្ពុជា ដែលបានគំាទ្រដល់ប្រទេសទីម័រឡេស្តេ ក្នុងការចូលជាសមាជិកអាស៊ាន នៅក្នុងឆ្នាំ២០២២នេះ។

ប្រធានាធិបតីទីម័រឡេស្តេ បានប្រាប់ដល់សម្តេចចក្រី ហេង សំរិន ថា ប្រទេសទីម័រឡេស្តេ នឹងខិតខំជំរុញទំនាក់ទំនងជាមួយកម្ពុជាលើគ្រប់វិស័យឱ្យរឹងមាំថែមទៀត។ ជាមួយគ្នានេះ ទីម័រឡេស្តេនិងកម្ពុជា នឹងមានជើងហោះហើរត្រង់ជាមួយគ្នានៅក្នុងពេលឆាប់ៗខាងមុខនេះ។

ប្រធានរដ្ឋសភា បានចាត់ទុកដំណើរទស្សនកិច្ចរបស់លោកប្រធានាធិបតីទីម័រឡេស្តេនៅកម្ពុជា នឹងរួមចំណែកពង្រឹង និងពង្រីកទំនាក់ទំនងមិត្តភាព និងកិច្ចសហប្រតិបត្តិការកម្ពុជា-ទីម័រឡេស្តេ ឱ្យបានកាន់តែប្រសើរឡើងថែមមួយកម្រិតទៀត។

សម្តេចចក្រី ហេង សំរិន បានគូសបញ្ជាក់ថា កម្ពុជាបានគាំទ្រពេញទំហឹងចំពោះប្រទេសទីម័រឡេស្តេ ចូលជាសមាជិកអាស៊ានទី១១ និងចូលជាសមាជិក អន្តរសភាអាស៊ាន សម្រាប់សភាប្រទេសទីម័រឡេស្តេផងដែរ។

សម្តេចចក្រី ហេង សំរិន បានបន្តថា ការបន្តថែរក្សាទំនាក់ទំនងមិត្តភាព និងកិច្ចសហប្រតិបត្តិការជាទ្វេភាគី និងក្នុងក្របខ័ណ្ឌសហគមអាស៊ាន ពិតជាមានសារសំខាន់ នៅក្នុងកាលៈទេសៈបច្ចុប្បន្ន និងទៅអនាគត ដែលសភាពការណ៍សកលលោក មានការប្រែប្រួល និងការវិវឌ្ឍឥតឈប់ឈរ៕